SIMPLENG PARAAN NANG MAPADALI ANG PAGLILINIS NG BAHAY

(ni CS SALUD)

WALANG panahon ang marami sa ating maglinis ng tahanan. Sa kaabalahan nga naman, kadalasan ay ipinagpapaliban natin ang paglilinis at pag-aayos ng bahay. May iba ngang kahit na ang magdekorasyon ay walang panahon.

Kunsabagay, mahirap nga namang isingit ang paglilinis at pag-aayos ng bahay sa mga kailangan nating tapusin sa araw-araw lalo na kung nagtatrabaho pa tayo o nag-oopisina. Pero siyempre, kaila­ngan din nating maglaan ng panahong malinis at maayos ang ating tahanan. Mahalagang na­lilinis natin ng maayos ang ating tahanan nang maging healthy ang buong pamilya.

Kaya’t dahil alam kong abala ang marami sa inyo, narito ang simpleng tips nang mapadali ang paglilinis ng tahanan—may okasyon man o wala:

MAG-INVEST NG GAMIT SA PAGLILINIS

Unang-una, kaila­ngan mag-invest ka ng tamang tools. Hindi puwedeng kung ano na lang. Mas mapapadali rin kasi ang paglilinis kung maayos at maganda ang ginagamit mong kagamitan. Kaya kung bibili, mas maganda kung iyong matibay na ang bibilhin mo para pang matagalan. Huwag ding basta-basta bibili ng mumurahin para lang sabihing may magagamit kang tools. Kumbaga, kilatisin muna ang mga bibilhin. Tingnan muna ang kagandahan ng mga bibilhin mong tools.

Mas maganda rin kung ang pipiliin mo ay pang matagalan na para hindi masayang ang perang ipinambili mo.

MAG-SCHEDULE KUNG KAILAN SISIMULAN ANG PAGLILINIS

Pangalawa na kailangang gawin ay ang paglalaan ng panahon kung kailan sisimulan ang paglilinis ng tahanan.

Oo, may ilan sa atin na hindi nagagawa ng isang araw ang paglilinis lalo na kung sobrang makalat at magulo ito.

Puwede rin namang kasing paisa-isang lugar o kuwarto ang lilinisin. Halimbawa ay simulan mo muna sa kuwarto o kusina. Tapos sa isang linggo naman ang kasunod na lugar.

Mas mainam ang paggawa ng schedule kung kailan sisimulan ang paglilinis at kung ano ang uunahin. Mag-stick din sa gagawing schedule nang masimulan at matapos ang gagawing paglilinis.

Puwede ring unti-untiin ang paglilinis nang hindi gaanong mapagod.

SIMULAN SA  CEILING ANG PAGLILINIS

Sa paglilinis din ng tahanan, napakahalagang sa itaas na bahagi ka magsisimula paibaba nang hindi madoble ang gagawin. Kaya simulan na muna ang paglilinis sa ceiling paibaba nang isang linisan na ang magawa at matapos kaagad. Kumbaga, linisin muna ang ceiling, bintana patungong sahig.

Huwag ding kaliligtaang linisin ang exhaust fan, electric fan at aircon.

MAGING PURSIGIDO SA GAGAWIN

Marami sa atin ang kahit na naka-schedule na ang gagawing pag­lilinis ng tahanan ay ipinagpapaliban pa rin. Kung minsan kasi, nakatatamad ang mag­linis. Para bang gusto na lang nating magpahinga lalo’t pagod tayo sa buong pagtatrabaho sa opisina.

Kung tatamarin at hindi pipilitin ang sarili, talagang mahihirapan tayong simulan ang mga gagawin. Kaya’t mainam na pilitin ang sarili. Ma­ging pursigido sa gagawin nang masimulan at matapos ito sa takdang panahon.

HUMINGI NG TULONG SA KAPAMILYA

Mapadadali rin ang isang gawain kung hihingi ng tulong sa kapamilya o mahal sa buhay.

Puwede ninyong gawing bonding ang paglilinis ng bahay. Hindi naman kaila­ngang sagarin ninyo ang sarili sa paglilinis. Kung ano lang iyong matapos ninyo ay okay na. Hindi nga ba’t mas maganda iyong may nasimulan kayo kaysa sa wala.

GAWING KASIYA-SIYA ANG PAGLILINIS

Kapag kasama nga naman natin sa paglilinis ang bawat miyembro ng pamilya, nagiging madali ang gawain.

Magiging kasiya-siya rin ang paglilinis at pag-aayos ng tahanan kung kompleto at tulong-tulong kayo ng mahal mo sa buhay.

Para rin mapadali ang paglilinis, puwede ninyong paghati-hatian ang gagawing paglilinis.

Kumbaga, iyong mga madadali lang gaya ng pagpupunas at pagwawalis ay maa­aring ipagawa sa mga bata.

UNTI-UNTIIN ANG PAGLILINIS NANG ‘DI MAHIRAPAN

Mainam din kung pananatilihing orga­nisado at maayos ang tahanan. Huwag ding hahayaang magkalat ang bawat miyembro ng pamilya. Kumbaga, kung may gamit o bagay mang gagamitin, ibalik kaagad ito sa tamang lalagyan matapos gamitin.

MAKINIG NG MUSIKA HABANG NAGLILINIS

Makatutulong din ang pakikinig ng musika habang naglilinis nang maengganyo sa ginagawa.

Marami nga namang naitutulong sa atin ang pakikinig ng musika kaya’t subukan ito habang naglilinis.

Mas ma-e-enjoy mo rin ang iyong ginagawa kapag may napaki­kinggan kang musikang maganda sa iyong pandinig.

MAG-CELEBRATE PAGKATAPOS NA MAGLINIS

Para rin mawala ang pagod ng buong pamilya, mainam din kung magsi-celebrate kayo pagkatapos ninyong malinis ang inyong buong kabahayan.

Puwede kang magluto ng masarap na putahe para sa buong pamilya. Swak din ang panonood ng paboritong palabas kasama ang mahal sa buhay.

Maraming paraan nang pagsi-celebrate bukod sa pagtungo sa mall o pagkain sa labas. Kahit sa loob lang kayo ng bahay, puwedeng-puwede pa rin kayong mag-enjoy.

Oo, nakatatamad naman talaga ang maglinis ng bahay lalo na kung hindi lamang ito ang pinagkakaabalahan o iniisip natin.

Gayunpaman, gaano pa man kahirap ang isang bagay pero kung gusto mong gawin ito, magagawa mo. (photos mula sa cleanmyspace.com, hoemed-it.com, youraustinstorage, zippyshell.com)