(Sisilipin ng Kamara) ANOMALYA SA SAP DISTRIBUTION

PINAIIMBESTIGAHAN ng Makabayan bloc sa Kamara ang umano’y maanomalyang transaksiyon sa pamamahagi ng cash aid sa ilalim ng social amelioration program (SAP) ng Department of Social Welfare and Development (DSWD) na nakasaad sa 2020 Commission on Audit (COA) report.

Sa House Resolution 2146 na inihain ng Makabayan, inaatasan ang House Committees on Good Government and Public Accountability at Public Accounts na magsagawa ng joint investigation ‘in aid of legislation’ kaugnay sa iregularidad sa distribusyon ng DSWD sa cash aid na naunang ibinunyag ni Senator Manny Pacquiao.

Nakasaad sa resolusyon na sa P14 billion na kabuuang pondo para sa SAP ay nawawala ang P10.4 billion dito.

Sa 1.8 million na SAP beneficiaries, aabot lamang sa 500,000  ang nakatanggap ng ayuda gamit ang e-wallet application na Starpay.

Batay pa sa 2020 COA report, aabot lamang sa 0.01% hanggang 11.48% ang pondong nai-transfer para sa cash aid ng DSWD sa ibang financial service providers tulad ng G-Xchange, Inc., PayMaya Philippines, Inc., Rizal Commercial Banking Corporation, Robinsons Bank Corporation at Union Bank of the Philippines.

Lumabas din sa report na may 135 SAP beneficiaries ang hindi na nakatanggap ng second tranche ng SAP na aabot sa P920,000 pero naka-tag sa database na “paid” na ang mga ito.

Umaasa ang mga kongresista ng Makabayan na mapapanagot sa gagawing imbestigasyon ng Kamara ang mga nasa likod ng anomalya sa SAP. CONDE BATAC

Related posts:

DFO PRAYORIDAD NG KAMARA (Itinutulak sa Kamara) 8-HOUR WORKDAY SA TEACHERS PULLOUT NG MULTI-NAT’L COMPANIES IIMBESTIGAHAN SA KAMARA 11 FRANCHISE BILLS NG ABS-CBN TATALAKAYIN NA SA KAMARA (Sa pagbuo ng 2021 nat’l budget) KAMARA TUTULONG SA PALASYO (Isinusulong sa Kamara) 5-6% HIKE SA 2021 BUDGET (Target ng Kamara) P1.5-T ECONOMIC STIMULUS FUND (Itinutulak sa Kamara) TAX HOLIDAY SA HEALTH WORKERS