SMB PLAYER SINUSPINDE NG GAB

PANSAMANTALANG sinuspinde ng Games and Amusements Board (GAB) ang lisensiya ng kontrobersiyal na si Daniel de Guzman ng San Miguel Beer matapos isnabin ang ipinatawag na Zoom meeting ng ahensiya para talakayin ang isyu ng kinasangkutang game-fixing.

“He shall not be allowed to use his license in the meantime and if proven guilty he may loose his professional basketball players license,” pahayag ng dismayadong si GAB Chairman Abraham ‘Baham’ Mitra sa ipinadalang mensahe sa media kahapon.

“Daniel de Guzman didn’t appear in GAB virtual meet invitation today. For failure to appear he is now blacklisted and admin proceedings shall commence,” ayon kay Mitra.

Bunsod nito, hindi makalalaro ang 24-anyos na si De Guzman sa mga laro ng San Miguel sa susunod na round ng PBA Philippine Cup.

Sa sulat na may lagda ni GAB professional sports division head Dioscoro Bautista, hiniling ng GAB ang presensiya ng bench player na si De Guzman sa Zoom meeting upang maipaliwanag ang kanyang posisyon sa naglabasang ulat na sangkot siya sa game-fixing sa laro ng San Miguel at Gineba nitong Setyembre 10 sa Bacolor, Pampanga.

Sa naturang laro, nagwagi ang Beermen laban sa crowd-favorite Kings, 111-102. Iisa ang may-ari ng naturang koponan na si Ramon S. Ang.

Lumutang ang senaryo ng game-fixing nang maging viral sa social media ang Facebook messaging kung saan marami ang nagrereklamo na natalo sa pustahan sa kabila ng ibingay umanong ‘tip’ ni De Guzman pabor sa Ginebra.

Itinanggi ni De Guzman, napili ng Beermen sa 2019 draft sa ika-42, ang pagkakasangkot sa game-fixing, ayon sa kanyang agent/manager na si Danny Espiritu.

Ayon kay Mitra, hindi mag-aatubili ang ahensiya na bawiin ang lisensiya ng professional athlete na mapatutunayang sangkot o gumawa ng kalokohan na ikasisira ng sports at ng liga.

“Hindi namin iyan palalagpasin. Malaking kasiraan ito sa liga at sa pro sports,” sambit ng dating Palawan governor at congressman.

Sa kasalukuyan, inihahanda na ng GAB ang mga kasong isasampa laban sa mga player at opisyal na napatunayang gumawa ng game-fixing sa laro sa VisMin Cup Visayas leg.

“Tapos na po ang imbestigasyon natin sa VisMin Cup issues. Inaayos na po natin ang mga legal na proseso. May mapaparusahan tayo diyan,” aniya. EDWIN ROLLON

Related posts:

BUDGET NG PSC, GAB SUPORTADO NG SENADO GAB 3RD PRO SPORTS SUMMIT LALARGA NA DAGDAG-BUDGET SA PSC AT GAB NA-PAPANAHON 3-0 PUNTIRYA NG MAGNOLIA; 2-1 PAG-AAGAWAN NG TNT, SMB JAO SA PRO SPORTS WALA NANG SAYSAY — GAB BAN SA PLAYERS NA SANGKOT SA GAME-FIXING IPINATUPAD NG GAB GAB: TIGIL MUNA ANG CONTACT PRO SPORTS PAGBABALIK NG PRO SPORTS APRUB SA GAB