Speaker Romualdez nakatutok sa presyo ng pagkain sa Quinta Com hearing

Lingid sa kaalaman ng karamihan, nakatutok si Speaker Martin Romualdez sa bawat hearing ng Quinta Committee hinggil sa mataas na presyo ng mga pagkain ngayon.

Ayon kay House Deputy Majority Leader Rep. Erwin Tulfo, “Every hearing bini-brief namin si Speaker Romualdez hinggil sa status at development ng hearing”.

“Siya naman kasi ang nag-utos na buuin ang Quinta Committee para maimbestigahan kung may cartel o sindikato na nagmamanipula ng presyo ng pagkain lalo na ang bigas”, ani Cong. Tulfo.

Lumalabas sa dalawang pagdinig na ng pinagsamang limang komite, ng ways and means, agriculture, trade and industry, social services, at food security, na nasa P33.15 lang ang kilo na bigas pagdating sa bansa ngunit umaabot sa P65 per kilo pagdating na sa palengke.

Ayon pa kay Tulfo, “Someone is making a lot of money at the expense of the consumers”.

Para naman kay House Committee on Agriculture Chairman Cong. Mark Enverga, “Ang purpose ni Speaker kaya itinatag itong Quinta Committee ay hanapan ng solusyon ang mahal na bilihin”.

“And we found out na may cartel nga na kumikilos at sila ang kumikita”, dagdag pa ni Enverga.

“We have made suggestion to the Speaker para mapababa ang presyo ng bigas sa merkado”, saad naman ni Iloilo 1st Dist. Rep. Janet Garin.

Pahabol ni Cong. Garin, “Mag-uusap ata si Speaker Romualdez at Agri Sec. Laurel this week para ilatag kung papaano pababain ang presyo ng bigas”.

Ayon naman sa Office of the Speaker planong lagyan ng Kadiwa stores ng DA ang bawat palengke para makabili ng murang bigas ang mga tao sa merkado.