SRP SA MANOK, BABOY

PINAPLANO ng Department of Agriculture (DA) at Department of Trade and Industry (DTI) na lagyan ng suggested retail price (SRP) ang mga karneng   manok at baboy.

Ito ay bunga ng  hindi maipaliwanag na pagtataas ng presyo ng manok at baboy sa  mga pamilihan  kahit na hindi gumalaw ang presyo  sa farm gate.

Sa ulat, nasa P88  hanggang P95 ang farm gate price ng buhay na manok at inaasahang nasa P128 hanggang P140 lamang ang market price nito, ngunit  pumapalo ito sa halagang P160 kada kilo sa merkado.

Ang buhay na baboy naman ay may farm gate price na P125 hanggang P130 kada kilo kaya  dapat itong ibenta sa halagang P200 kada kilo lamang, subalit naglalaro ang ­presyo nito sa mga palengke sa  P230 hanggang P250  kada kilo.

Hinala ng DTI at DA na ginagamit na rason ng ilang grupo ang pagtaas ng presyo ng mga produktong petrolyo para magawa rin nilang magtaaas ng presyo ng kanilang mga produkto.

Itinanggi naman ng mga producer na may kinalaman ang pagtaas ng ­presyo sa  pagtaas ng ­presyo ng petrolyo.

Ayon sa Samahang Industriya ng Agrikultura (SINAG), wala sa side ng producer  ang inflationary nature  sa presyo  ng manok, baboy o isda.

Kamakailan ay inihayag din ng DA at DTI  na sisimulan nang lagyan ng SRP ang bigas at iba pang agricultural products upang hindi manamantala ang mga negosyante.

Sinabi ni Agriculture Secretary Manny Piñol,  na sisimulan ang pagpapatupad ng SRP sa bigas sa Metro Manila upang  ito ay ma-monitor. AIMEE ANOC