NAGSAGAWA ng “SSS Service on Wheels” nitong Huwebes sa Pasay City public market na proyekto ng Pasay City Public Market Multi-Purpose Cooperative.
Ayon kay Pasay City Mayor Emi Calixto-Rubiano, isinagawa ang “SSS Service on Wheel” sa public market driveway sa Libertad Street mula alas-8 ng umaga hanggang alas- 4 ng hapon.
Ang nasabing proyekto ay pinangunahan ng multi-purpose cooperative upang matulungan na maging miyembro ang mga vendor sa Social Security System (SSS) kung saan ipinakita lamang ng mga bumisita sa nasabing programa ang dalawang valid IDs (identification cards).
Bukod sa mga vendor, tumanggap din ang “SSS Service on Wheels” ng mga residente ng lungsod na nais maging miyembro ng nabanggit na ahensiya.
Ang serbisyo na ipagkakaloob ng “SSS Service on Wheels” ay ang transaksyon ng salary loan, sickness at maternity leave, retirement, death at funeral transactions, pati na rin ang pagpapalit ng data ng isang miyembro. MARIVIC FERNANDEZ