BICOL- BINARIL at napatay ang isang dating miyembro ng New Peoples Army (CPP-NPA) ng kanyang mga kasamahan sa loob ng sabungan ng Barangay Guinlajon, Sorsogon City kamakalawa ng hapon.
Kinilala ang biktima na si Rey Esposado alyas”Ka Rigor”, kabilang sa grupo ng mga gerilyang NPA na sumuko at nagbalik loob sa pamahalaan noong April 2018.
Nabatid ganito rin ang nangyari sa mga naunang kasamahan ng biktima na sina Antonio Benzon Jr.alyas”Ka Hazel”noong Pebrero.2020 at Michael Donaire alyas”Ka Abe”noong Oktubre 2019 na pinatay ng mga dating kasamahang NPA nang magkakasamang sumuko at nagbalik loob sa pamahalaan.
Mariin namang kinondena ng Sorsogon PNP sa pamumuno ni Provincial Director Col Dionesio Laceda ang patraydor at walang kalaban laban na pamamaril at pagpatay ng NPA sa dati nitong miyembro.
Patuloy pa ang isinasagawang pagtugis ng militar at pulisya sa dalawang suspek na mabilis na tumakas matapos maisagawa ang krimen.
BONG RIVERA