SUNDALO INAMBUS: 1 PATAY, 1 SUGATAN

SULTAN KUDARAT- DEAD on the spot ang isang off-duty na sundalo habang nasa malubhang kalagayan naman ang kasamahan nito matapos silang tambangan ng mga armadong kalalakihan sa Sitio Sandakan, Barangay Dalumangcob sa lalawigang ito.

Sa natanggap na ulat ni Lt. Col. Julhamin Asdani, hepe ng Sultan Kudarat Police, kinilala ang napatay na sundalo na si Staff Sgt. Darwin Alaba ng Army’s 1st Brigade Combat Team.

Kasalukuyan namang nilalapatan ng lunas sa pagamutan ang sugatan kasamahan nito na si Pfc. Erwin Villa.

Ayon kay Asdani, lulan ng motorsiklo ang 2 sundalo patungong Cotabato City nang pagbabarilin ng mga armadong lalaki.

Hinihinalang tinugaygayan ng mga hindi pa nakikilalang suspek ang dalawang biktima sa kahabaan ng national highway at nang madikitan ay saka sila pinagbabaril.

Patuloy ang isinasagawang imbestigasyon ng mga awtoridad para matukoy ang mga salarin.
VERLIN RUIZ