SUSPENSION NG RICE IMPORTATION (Duterte wala pang ini-uutos)

TALIWAS  sa mga ulat, nilinaw ng Palasyo ng Malakanyang kahapon na walang iniuutos ang Pangulong Rodrigo Duterte  na supension  ng  pag-aangkat ng bigas.

“As of this time there is no order to stop rice importation given the [Secretary William Dar] of the Department of Agriculture per the latter,”  pahayag ni Presidential Spokesperson Salvador “Sal” Panelo.

Sa eksklusibong ulat ng GMA News ay iniha­yag ng Pangulong Duterte ang  pansamantalang pagpapatigil sa rice importation   upang  matugunan ang  usaping kinahaharap ng mga lokal na magsasaka  bunga ng pagpapatupad ng Rice Tariffication Law.

Isinabatas ang  rice tarrification  nitong Pebrero  upang mapababa ang presyo ng  bigas  sa pamamagitan ng pagpapaluwag  sa import restrictions, na nagpalaki ng supply sa bansa.

Bumaha ang  mga imported na bigas sa merkado na ang epekto ay pagbaba naman ng presyo ng palay.

Sa panayam ng The Source ng CNN Philippines, sinabi ni Agriculture Spokesperson Noel Reyes na wala pang natatanggap ang ahensiya na kautusan mula sa Malakanyang  kaugnay sa pagsuspinde sa rice importation.

Binigyang-diin ni Reyes na ang dami o volume ng imported rice  ay bababa pa rin kahit na  walang utos  mula sa Pangulo sa gitna ng panahon ng anihan.

“We heard the news and we are still awaiting the directive from Palace, from the President himself, but then again ma­rami nang imported rice dito, so even if he will not say it, konti na lang talaga ang magi-import,” pahayag ni Reyes.

Nabatid na  umaayon ang Department of Agriculture kay Finance Secretary Sonny Dominguez na hindi na kailangang i-repeal  ang  nasabing measure.

Nakakolekta na ang gobyerno ng tinatayang 11 bilyong pisong buwis mula sa  outsourced rice.

Sa ilalim ng batas, popondohan ng tax proceeds ang mga programang makatutulong sa mga magsasaka katulad ng  maramihang patubig, rice storage at  research initiatives.