TELECONFERENCING SA PLENARY SESSION APRUB SA 15 SENATORS

INAPRUBAHAN na ng 15 senador na dumalo sa pagbubukas ng sesyon kahapon ang pagsasagawang  teleconferencing sa plenary session at committee hearings sa Senado.

Pinaboran ng mga senador ang Senate Resolution bilang 372 na layong  magsagawa ng sesyon  sa pamamagitan ng teleconference, video conference at iba pang uri ng remote o electronic means.

Sa ilalim ng SRN 762 inamiyendahan ang Rule XI  Section 22 at  Rule XIV  Section 41 ng Rules of the Senate na kung saan papayagan ang plenary session at committee hearings sa pamamagitan ng teleconference.

Ang nasabing mungkahi ay  bunsod na rin ng nagpapatuloy na COVID-19 pandemic  na kung saan ay kinakailangang manatili sa kanilang tahanan ang  taumbayan alinsunod na rin  sa ipinaiiral na enhanced community quarantine (ECQ).

Nananatili ang ECQ sa Metro Manila at ilan pang apektadong probinsiya  hanggang Mayo 15, 2020 habang isinailalim naman ang ilang probinsiya sa General Community Quarantine (GCQ) na nagsimula  nito lamang Mayo 1, 2020

Gayundin, ang buong bansa ay isinailalim sa state of emergency dulot ng COVID-19 noong Marso na magtatagal ng anim na buwan maliban na lamang kung babawiin na o papalawigin pa ng Pangulong Rodrigo Duterte

Pananatilihin din sa Senado ang safety measures para maprotektahan ang integridad ng plenary session at committee hearings. VICKY CERVALES