TIYUHING KILLER NG MAG-INA DEDO SA PULIS

SORSOGON-PATAY sa follow up operation ng mga tauhan ng PNP-Police Regional Office 5 ang suspek sa pagpatay sa kanyang pamangkin at 6-anyos na apo nang manlaban sa pulisya sa lalawigang ito.

Sa ulat na isinumite sa tanggapan ni PNP-PRO5 Regional Director Jonnel C Estomo ng Sorsogon Provincial Police Office, kinilala ang suspek na si Joey Llames Blanca.

Nabatid na bandang alas-10 kamakalawa ng umaga ay nakatanggap nang tawag ang himpilan ng Castilla MPS na may mag inang pinatay sa mismong tahanan nito sa Sitio Bagongon Brgy. Tomalaytay sa bayan Castilla.

Agad na nirespondehan ng mga awtoridad ang sumbong at tumambad sa mga operatiba ang mga duguang biktima na sina Rose Ann May E Tariga, 23-anyos at anak nitong batang babae na ginilitan at pinagsasaksak din sa mukha at katawan.

Isa sa mga motibong nakikita ni Sorsogon Police Provincial Office sa pamumuno ni Provincial Director PCOL Arturo P Brual Jr ang tangkang pangagahasa kung saan si Rose Ann ay nagtamo ng malalim na sugat sa pagitan ng kanyang mga hita, halos maputol na rin ang kanyang ulo, basag din ang panga nito at tinitingnan angulo ang seksuwal na pang-aabuso dahil sa nadatnan itong hubot hubad ng kanyang mga kamag-anak.

Ayon kay PNP-PRO5 Spokesperson Major Malou Calubaquib , mapalad namang naiwang buhay ang isang taong gulang na sanggol na anak din ng biktima.

Sa aktibong pakikipag-ugnayan ng mamamayan ng nasabing lugar, bandang alas-2 ng hapon ay natukoy na ang kinaroroonan ng suspek sa Brgy. Bagalayag, Castilla, Sorsogon kung saan ito nagtatago.

Habang binabagtas ng operatiba ang daan ay namataan nila ang suspek at agad itong dinampot,dito inamin ni Joey ang nagawang kasalanan sa kanyang pamangkin at apo.

Subalit, nang pabalik na sa istasyon ng Castilla dakong alas-3 ng hapon,nagpumiglas ang suspek, nakipagbuno sa arresting team at inagaw ang baril ng isang pulis sabay tutok at nagbabadyang paputukan ang mga pulis.

Dahil sa banta ng panganib, napilitang magpaputok ang iba pang operatiba upang ipagtanggol ang tropa at tinamaan ang suspek na isinugod sa ospital subalit idineklarang dead on arrival. VERLIN RUIZ