NORTH COTABATO – NAPAAGA ang salubong ni kamatayan sa 3-anyos na totoy makaraang mahulog sa ginagawang septic tank sa gilid ng bahay ng barangay kagawad sa Purok Namnama sa Brgy. Dagupan sa bayan ng Kabacan kamakalawa ng hapon.
Ayon sa ulat ng pulisya, naglalaro ang biktimang si Ramram Sheena kasama ang dalawang bata nang mapadako sa ginagawang poso negro sa paligid ng bahay ni Kagawad Raymundo Gracia.
Gayunman sa hindi inaasahang pagkakataon ay nadulas at nahulog sa septic tank na may lalim na tatlong talampakan at may tubig kung saan hindi naman namalayan ng may-ari ng bahay na may nahulog na bata.
Makalipas ang 30-minuto ay namataan na lamang ang biktima na lumulutang sa septic tank kaya mabilis itong isinugod sa pagamutan subalit hindi na umabot ng buhay.
Kasalukuyang pinag-aaralan ng pulisya kung may pananagutan ang may-ari ng septic tank para sampahan ng kaukulang kasong kriminal. MHAR BASCO
Comments are closed.