PASAY CITY – SUGATAN ang isang traffic enforcer ng Metropolitan Manila Development Authority (MMDA) makaraang saksakin ng isang snatcher na kanyang hinahabol kamakalawa ng gabi sa Pasay City.
Ang biktima na mabilis na isinugod sa Pasay City General Hospital upang lapatan ng lunas ang kanyang tinamong saksak sa katawan ay kinilalang si Randy Domong-as, 46, MMDA Traffic Constable 3, tubong Maluan-luan, Pola, Oriental Mindoro.
Agad namang inaresto ang suspek na nakilalang si Rolando Reank, 41, residente ng 2489 P. Villanueva St., Barangay 88, Pasay City.
Naganap ang insidente dakong 11:55 ng gabi kamakalawa sa Barangay 76.
Nagmamando ng trapiko si Domong-as nang makarinig ito ng sigaw ng isang vendor na may snatcher na patungo sa kanyang direksiyon.
Hinarang ni Domong-as si Reank subalit sinalubong siya nang saksak nito.
Masuwerte namang may pulis na nagpapatrolya sa naturang lugar kaya naaresto ang suspek. MARIVIC FERNANDEZ
Comments are closed.