PATAY ang isang pedicab driver matapos aksidenteng mabangga ng isang motorsiklo sa Navotas City, kamakalawa ng gabi.
Dead on arrival sa Navotas City Hospital sanhi ng tinamong pinsala sa ulo at katawan ang biktima na kinilalang si Dennis Pagulayan, 39-anyos ng R-10, Brgy., NBBN Proper.
Nahaharap naman sa kaukulang kaso ang driver ng Yamaha NMAX na may plate No. (630ATF) na kinilalang si Manuel Maribojoc, 51-anyos ng 5 Vincent St., B.F Road Quezon City.
Sa report ni SSg Levi Salazar kay Navotas police chief Col. Dexter Ollaging, dakong alas-7:45 ng gabi nang maganap ang insidente kahabaan ng Road-10, NBBS Proper.
Sa inisyal na imbestigasyon, tinatahak ni Maribojoc sakay ng kanyang motorsiklo ang naturang lugar patungong Malabon City nang aksidente nitong mabangga ang biktima na nagtangkang tumawid sa lugar.
Matapos ang insidente, mabilis na isinugod ang biktima sa naturang pagamutan subalit, hindi na ito umabot ng buhay habang dinala naman ang driver ng motorsiklo sa himpilan ng pulisya. VICK TANES