BULACAN- Dead on arrival sa pagamutan ang isang lalaki makaraang pagbabarilin ng kapwa driver sa Brgy, Banaban 1 sa bayan ng Angat ng lalawigan ito.
Sa inisyal na report ni Acting PNP Provincial Director Supt Rommel Ochave, kinilala ang biktima na si Roberto Espayos Y Del Rosario, 56-anyos, truck driver, residente sa nabangit na lugar habang arestado naman ang isa sa dalawang suspek na si Alfie Bantog Y Valecia, 32-anyos at nakatakas naman ang kasamahan nito na si alyas Macmac Bantog.
Base sa paunang imbestigasyon ng mga awtoridad ganap na alas-7 ng gabi nang maganap ang pamamaril sa biktima.
Ayon sa anak na babae ng biktima, lumabas ng bahay ang kanyang ama para namimitas ng gulay na talong sa plantasyon nang makarinig siya ng tatlong putok ng baril.
At nang magtungo sa nasabing lugar ng pinangyarihan ng krimen ay nakitang nakabulagta ang biktima na agad isinugod sa ospital at tatlong basyo ng Kaliber 45 ang nakita ng mga pulis.
Samantala, patuloy naman ang isinasagawang imbestigasyon ng mga awtoridad kung ano ang motibo sa pamamaslang. THONY ARCENAL