TRUCK DUMAUSDOS: 1 PATAY, 4 SUGATAN

CAVITE-DEAD on the spot ang isang Biology student nang maipit ng truck na dumausdos pababa habang nakapark sa loob ng campus ng Cavite State University nitong Lunes ng umaga.

Kinilala ng Indang police station ang biktima na si Elaisa Tesoro,18-anyos habang sugatan naman ang apat nitong kaklase na sina Fiona Gatchalian; Gabriel Angelo Magno; Denise Chloe Ricohermoso at Pauline Diga.

Sa pahayag ni Maj Edward Cantano, chief of police ng Indang, nagdeliver umano ng mineral water ang Elf Canter truck na minamaneho ng isang alias “ John” nang iparada nito sa gilid ng kalsada ang sasakyan na kung saan sa gawing ibaba nito ay abalang nagre-review ng kanilang lesson ang limang biktima.

Ayon sa mga estudyanteng nakasaksi sa insidente, bigla umanong dumausdos ng mabilis ang truck at tinumbok nito ang isang puno kung saan nakakabit ang isang bangko na kinauupuan ng mga estudyante.

Sinabi pa ni Cantano na walang handbrake ang truck at hindi umano nilagyan ng driver ng kalso ang mga gulong kaya madali itong sumadsad pababa sa direksyon ng mga biktima.

Nakakulong na ang driver sa Indang custodial cell at nahaharap sa kasong reckless imprudence resulting to homicide at multiple physical injuries. ARMAN CAMBE