LABING-ISANG TAO ang nasawi habang limang iba pa ang nasugatan matapos na mahulog sa bangin ang truck na sinasakyan ng mga ito nitong Miyerkules ng hapon sa Mabinay, Negros Oriental.
Batay sa inisyal na ulat ng PNP, naganap ang insidente dakong 1:45 ng hapon sa Sitio Tubod Barangay Bulwang, Mabinay sa nasabing probinsya.
Ang mga biktima ay pawang mga namimili ng baka sa probinsya.
Galing ang mga biktima sa Libertad at patungo sana sa bayan ng Mabinay nang maganap ang aksidente.
Habang binabaybay ng truck ang kalsada ay nawalan ito ng preno kaya’t nahulog ito sa bangin at bumaliktad.
Nagtamo ng matinding sugat sa katawan ang mga biktima dahilan upang masawi ang mga ito.
Sa kasalukuyan, patuloy ang isinasagawang imbestigasyon sa insidente.
EUNICE CELARIO
