VALENZUELA CITY– KULUNGAN ang kinasadlakan nang isang tulak ng ilegal na droga at kasabwat nito matapos madakip ng mga pulis habang limang katao pa ang nadakip sa hiwalay na buy bust operation sa lungsod na ito noong Miyerkules ng gabi.
Nakapiit sa detention cell ng Valenzuela City Police ang mga suspek na sina Wilfredo Ferrer, 38, tubong Meycauayan at kasalukuyang naninirahan sa Karuhatan ng nasabing lungsod at Angel Fernandez, 31, residente Antipolo City.
Base sa imbestigasyon ni PSSg Analiza Antonio, dakong alas-9:00 ng gabi nang magsagawa ng buy bust operation ang mga operatiba ng Valenzuela City Police Station Drug Enforcement Unit (SDEU) sa pangunguna ni PCapt. Segundino Bulan Jr., sa McArthur highway, Brgy. Marulas.
Ayon sa ulat ng pulisya, nagawang makabili ni PCpl Ronald Padlan Jr. na umaktong buyer ng isang plastic sachet ng shabu sa dalawang suspek at nang matapos ang transaksiyon ay agad itong nagbigay ng hudyat sa kanyang mga kasamahan at inaresto nina PCpl Kolleen Primo at PCpl Ed Shalom Abiertas sina Ferrer at Fernandez.
Samantala, bandang alas-4:30 noong Huwebes ng madaling araw nang madakip ng mga operatiba ng SDEU team 2 sa isinagawang buy bust operation sa M. Gregorio St., Canumay West ang mga suspek na sina Edwin Jacinto, 34; Christian Carlos alyas “Ogag”, 22; Jhayson Carlos, 21; Ricardo Santos Jr. alyas “Jr”, 36, at John Paul De Lemos 37, pawang mga residente ng Valenzuela City.
Sa imbestigasyon ni PSSg Carlos Erasquin Jr., nagawang makabili ng isang plastic sachet ng shabu ni PCpl Julius Bernardo na nagpanggap na buyer ng droga kay Jacinto at nang matapos ang transaksiyon ay nagbigay na ito ng hudyat sa kanyang mga kasamahan na nakapaligid sa nasabing lugar.
Agad na lumapit ang mga back-up nito at nadakip ni PCpl Kenneth Marcos si Jacinto at narekober rito ang isang maliit na leather coin purse na naglalaman ng sampung heat sealed transparent plastic sachet ng shabu, tatlong P100, dawalang P50 at P300 na buy bust money.
Habang nadakip din ng iba pang operatiba si Christian Carlos na kasabwat ni Jacinto sa pagbebenta ng ilegal na droga habang nakuhaan naman si Santos at De Lemos ng tig-dalawang plastic sachet na naglalaman ng shabu habang isang plastic sachet ang nakuha kay Jhayson Carlos. EVELYN GARCIA
