KULUNGAN ang bagsak ng isang 63-anyos na lolo na umano’y tulak ng ilegal na droga, matapos itong maaresto sa ikinasang buy bust operation sa Navotas City, Huwebes ng hatinggabi.
Sa report kay P/Col. Rolando M. Balasabas, hepe ng Navotas Police, kinilala ang nadakip na si Isagani Malaca, mangingisda, nakatira sa M. Fernando Street, Wawa, Barangay Tangos, South ng nabanggit na lungsod.
Sa imbestigasyon, dakong alas-11:30 ng gabi, nagkasa ng buy bust operation ang mga tauhan ng Station Drug Enforcement Unit (SDEU) ng Navotas Police sa Abiola Street, Tangos, North, Navotas City.
Isa sa mga parak ang nagpapanggap na iiskor ng shabu kay Malaca ng halagang P200.
Matapos iabot ng suspek ang isang plastic sachet na may lamang ilegal na droga, dito na siya pinosasan ng iba pang pulis na kasama ng buyer.
Matapos kapkapan, nakuha kay Malaca ang 10 pang piraso ng plastic sachet na may lamang shabu.
Nahaharap sa kasong Violation of Sec. 5 at Sec. 11 of R.A. 9165 ang mangingisda.
Ayaw namang magsalita ng suspek kung bakit nagbebenta pa ito ng shabu sa kabila ng kanyang edad. VICK TANES
