LEGASPI CITY-HINDI umabot ng pasko ang drug pusher nang mabaril at mapatay ng mga tauhann ng PNP-PRO5 sa inilunsad na anti narcotics operation sa Purok 1, Brgy. Lidong, Sto Domingo sa Albay.
Kinilala ang suspek na si Junnie Barrios Y Oporto, 33-anyos, may asawa, at residente ng Zone 3, Brgy. San Roque, Bombon, Camarines Sur.
Ayon sa report mula sa Albay Police Provincial Office, nauwi sa isang armed confrontation ang nasabing operasyon nang magpumiglas ang suspek.
Nakuha mula kay Barrios ang isang pakete ng selyadong plastic na naglalaman ng shabu na nagkakahalaga ng P5,000.00.
Bukod dito, narekober din mula sa suspek ang isang kalibre .38 rebolber na walang serial number; 5 basyo ng bala para sa naturang baril; 3 basyo ng 9mm luger; at dalawa pang heat sealed transparent ng plastic ng naglalaman din ng ipinagbabawal na gamot.
Ang imbentaryo at pagmamarka ng nasabing ebidensiya ay nasaksihan ng mga mandatory witnesses mula sa barangay at media.
Nagtamo naman ng sugat ang isa sa mga operatiba na si Cpl Ronald Largo Serrano sa kanyang kanang kamay habang nasa kalagitnan ng operasyon. VERLIN RUIZ