(UAAP men’s football) UP VS DLSU; ATENEO VS FEU

Mga laro ngayon:

(Rizal Memorial Stadium)

2 p.m. – UP vs DLSU (Men Semis)

4 p.m. – Ateneo vs FEU (Men Semis)

TARGET ng defending champion University of the Philippines na makabalik sa Finals sa pakikipagtipan sa De La Salle sa UAAP Season 81 men’s football Final Four ngayon sa Rizal Memorial Stadium.

Ang kick-off  ay nakatakda sa alas-2 ng hapon.

Magsasagupa ang  Ateneo at Far Eastern University, dalawang koponan na nagharap para sa korona, dalawang taon na ang nakalilipas at kapwa determinadong mabawi ang nawalang glorya, sa isa pang semifinal match sa alas-4 ng hapon.

Ang mga mananalo sa knockout matches na ito ay maghaharap sa one-game final sa Mayo 16 sa parehong Malate venue.

Nalusutan ang first round struggles kung saan nasa halos ilalim sila ng league table, ang Fighting Maroons ay bumangon at hindi nakatikim ng talo sa second round na may anim na panalo at isang draw upang magtapos sa ikalawang puwesto na may 26 points.

Samantala, kinailangan ng Green Archers ng apat na sunod na panalo upang magtapos sa ikatlong puwesto na may 25 points.

Na-split ng UP at De La Salle, nagharap din sa Final Four noong nakaraang taon, ang kanilang head-to-head ngayong season.