PLANO ng UAAP na simulan ang basketball competition nito para sa Season 84 sa Pebrero 2022, habang ang volleyball ay matapos ang Holy Week.
Ayon kay UAAP Season 84 president Nonong Calanog ng De La Salle University, hinihintay nila ang approval ng Commission on Higher Education (CHED), Department of Health (DOH), at ng Inter-Agency Task Force (IATF) para makapagpatuloy ang student-athletes ng training sa isang bubble set-up.
“Our projection is to return to competition by mid-February 2022,” wika ni Calanog sa isang press conference sa CHED, kung saan binakunahan ang UAAP student-athletes kontra COVID-19.
Kinansela ng UAAP ang second semester sports nito para sa Season 82 dahil sa pandemya at hindi nagdaos ng 83rd season.
“As far as the UAAP Board is concerned, depending on the approval for the return to training, we’re projecting a start for basketball hopefully by February,” ani Calanog.
“But that will depend on when we can get our athletes back to training, because we want to make sure they are ready for competition.”
Aniya, humihiling ang UAAP coaches ng tatlong buwang training para sa basketball players.
“Our hope is that approval for return to training would be soon, so that we can get them into the bubble and start training by November 1,” dagdag pa niya.