UNITEAM SUPPORTERS NAGSANIB-PUWERSA SA SAN JUANICO BRIDGE

ISANG makasaysa­yang pagtatagpo ng mga tagasuporta nina UniTeam Presidential aspirant Ferdinand ‘Bongbong’ Marcos Jr. at Vice Presidential bet Sara ‘Inday’ Duterte ang naganap noong Martes ng hapon, Nob­yembre 30, 2021, sa pinakamahabang tulay sa bansa, ang San Juanico bridge, na nagdudugtong sa probinsya ng Leyte at Samar.

Ang “salubong” sa San Juanico Bridge ay pagkakaisa ng hilaga at timog na sumisimbolo sa pagkakaisa ng Luzon, Visayas at Mindanao sa likod ng BBM-Sara UniTeam at sa paniniwalang sa pamamagitan ng mapagkaisang liderato ng dalawa ay makakamtan ng bansa ang pagkakaisa, kapayapaan at progreso.

Ayon kay Marcos Jr., ang makasaysayang pagsasanib puwersa ng mga tagasuporta nilang dalawa ni Sara ay hudyat ng tagumpay ng mamamayang Pilipino sa matinding hamon na dala ng pandemya.

Kumpirmasyon din ito ng tuloy-tuloy at pagpapaigting pa ng mga programang nasimulan at napagtatagumpayan na ng administrasyon ni Pangulong Rodrigo Roa Duterte.

“Napakaganda ng pangyayari na ito dahil ang pagsasama ng isang Marcos at Duterte ay isang magandang simbolo ng pagkakaisa ng bansa. Ako from North at si Inday Sara from the South at nagkita dito sa Eastern Samar,” pahayag ni Marcos Jr.

Tuloy-tuloy rin ang pangunguna ng dalawa sa lahat ng pormal (methodological) at random man-on-the-street survey katulad ng serye  ng Kalye Survey sa bansa kung saan napakalaki ng naitatalang kalamangan ng kanilang tandem.

Ang San Juanico Bridge na pinuno ng mga supporter ng dalawa na pawang nakabihis kulay pula at berde ay may kabuuang haba na 2,200 metro. Ito ay bahagi ng Pan-Philippine Highway na proyekto ni dating Pa­ngulo Ferdinand Marcos at inihandog sa asawang si Imelda Marcos na kilalang Waraynon.

 

SIMULA ngayon ay maari nang magsumite ng kanilang application para sa security detail o police security escort ang mga tumatakbo para sa iba’t ibang elected  position.

Ayon kay PNP chief Gen. Dionardo Carlos, pinasisimulan na nila ang pagtanggap ng application for security detail ng mga political aspirant na may mga kinahaharap na seryosong banta sa kanilang buhay.

Nabatid na kailangang  gawin online ang kanilang application o mga request sa website ng Commission on Elections (Comelec) na www.comelec.gov.ph

I-download, i-print at pirmahan lang ang CBSFC form mula sa website ng Comelec at samahan ng  2×2 picture, threat assessment gayundin ang CBSFC form na ibibigay ng concerned government agency.

Una rito ay ipinag -utos ni Gen. Carlos ang pagbawi o pag-recall ng mga security detail ng mga VIP o mga kandidato, subalit maari naman itong ibalik at kailangan lamang nila na  mag-apply muli at para maproseso  ang kanilang aplikasyon.

Samantala, ang mga na -recall na police security detail ay nakatakdang sumailalim sa VIP Security and Protection Refresher Course.

Nilinaw naman ni PNP spokesperson Col. Roderick Augustus Alba na exempted sa recall ng mga security detail ang mga government official gaya President, Vice President, Senate President, Speaker of the House of Representatives, Chief Justice ng Supreme Court, Secretary of National Defense, Secretary of the Interior and Local Government, Chairman at Commissioners ng Comelec, AFPN Chief of Staff,  AFP Major Service Commanders, PNP chief at Senior Officers ng PNP.

Inihayag din nito na  nagsisimula na rin  tumanggap ng aplikasyon ang PNP at Commission on Election para sa mga kandidato na nagbabalak na  kumuha ng gun ban exemption. Ang Comelec ay magpapatupad ng total gun ban   para sa lahat maliban sa mga uniformed national security personnel   sa panahon ng halalan.

“Under the COMELEC Resolution 10728, the poll body set regulations on the ban on the Bearing, Carrying or Transporting of Firearms or Other Deadly Weapons; and Employment,  Availment or Engagement of the Services of Security Personnel or Bodyguards in the duration of the Election period from January 9, 2022, to June 8, 2022, ” pahayag ni Gen. Carlos.

Magsisimula ang election period sa Enero 9, 2022 hanggang Hunyo 8, 2022. VERLIN RUIZ