UP VS NU SA FINALS

NAISAAYOS ng University of the Philippines ang men’s Finals rematch sa reigning four-time ­titlist National University matapos ang 3-2 panalo laban sa Ateneo sa  UAAP Season 81 badminton tournament kahapon.

Naitala nina JM Bernardo at Vinci Manuel ang 21-15, 21-15 panalo laban kina Fides Bagasbas at Sean Chan sa second doubles, habang ginapi ni rookie Kyle Le­gaspi, na bumawi mula sa second set defeat upang igupo si Carlo Remo, 21-12, 9-21, 21-17, sa deciding singles upang kunin ng Fighting Maroons ang tie.

Ipinagkaloob ni Bernardo ang isa pang panalo ng UP sa pamamagitan ng 24-22, 21-4 pagdispatsa kay Bagasbas sa first ­singles.

Sisimulan ng Bulldogs at Maroons ang kanilang best-of-three tie sa Miyerkoles, alas-8 ng umaga, sa Rizal Memorial Badminton Hall.

Nakompleto ng NU  ang 6-0 elimination round sweep at nagwagi ng 41 sunod na ties.

Sa women’s division,  nakompleto ng Ateneo ang reversal nito sa twice-to-beat sa NU sa pamamagitan ng 3-2 panalo sa ‘Final Four’ decider upang maisaayos ang Finals duel sa UP simula bukas ng ala-1 ng hapon.

Kuminang sina doubles pla­yers Geva de Vera at Chanelle Lunod habang ibinigay ni Samantha Ramos ang clincher sa third singles para sa Lady Eagles upang makompleto ang pag-ahon mula sa 1-2 pagkakabaon sa kapana-panabik na tie.

Natalo rin ang Lady Bulldogs sa semis opener, 1-3, noong Linggo.

Nakopo ng Lady Maroons ang unang slot sa best-of-three cham­pionship tie nang tapusin ang paghahari ng De La Salle,  3-1.