VAN VS TRICYCLE: MAG-IINA DEDO, 4 SUGATAN

BULACAN-PATAY ang mag-iina habang apat ang sugatan matapos magkasalpukan ang isang tri­cycle at van sa kahabaan Maharlika/Cagayan Valley Road ng Brgy. Buliran sa bayan ng San Miguel sa lalawigang ito.

Kinilala ang nasawing mag-iina na sina Monica Ramos, 29-anyos; mga anak na lalaki na sina AJ, 5-anyos at Miguel, 7-anyos habang ang mga sugatan ay sina Vanessa Francisco Maniquiz, 22-anyos; Haidee Francisco dela Cruz, 13-anyos; Lara Capulong Ramos, 10-anyos at ang isang taong gulang na si Jacob Elias dela Cruz.

Base sa ulat, naganap ang banggaan ng tricycle at XLT van kahapon bago mananghalian.
Sa inisyal na report ni SSg.Jose Ryan Vendil, napag-alaman na ang mga pasahero ng tricycle ay patungo sa Brgy, Buliran para magpabakuna kontra COVID-19 virus nang maganap ang insidente.

Agad na dinala sa San Miguel District Hospital ang mga sugatan para sa paunang lunas subalit kalaunan ay inilipat sa PJG Hospital sa Cabanatuan City.

Sumuko naman sa mga awtoridad ang driver na si Angelino Paras, 61-anyos ng Brgy. Mambangnan, San Leonardo,Nueva Ecija na nahaharap sa kasong Multiple Homicide and Multiple serious Physical injuries. THONY ARCENAL