Nagpahayag ng panghihinayang ang pamilya Veloso nang hindi matuloy ang kanilang biyahe patungong Indonesia para bisitahin si Mary Jane Veloso.
Nakatanggap ng sulat ang pamilya mula sa Department of Foreign Affairs (DFA) na nagsasabing hindi na matutuloy ang kanilang biyahe na nakatakda sana ng December 16 hanggang 17.
Batay sa sulat ng DFA, nakatakdang ibiyahe sa nasabing petsa si Mary Jane papuntang Jakarta para simulan ang proseso ng kanyang pag-transfer pauwi ng Pilipinas.
Ang paglipat kay Mary Jane sa Jakarta ay batay sa utos ng Indonesian Ministry for Law, Human Rights, Immigrations and Corrections.
Sa ngayon ay wala pang takdang araw o petsa kung kailan makakauwi ng bansa ang convicted OFW.
Magugunitang sinabi ng Indonesian government na bago mag-Pasko makakauwi na ng bansa si Mary Jane.
Sa kabila nito ay inihayag ng pamilya Veloso na sila ay masayang masaya dahil malapit na ang pag-uwi ni Mary Jane.
Wala umanong ipinataw na kondisyon ang gobyerno ng Indonesia kapalit ng pagpayag na maiuwi na ang Pinay.
Ayon naman sa 16-anyos na anak ni Mary Jane, laking pasalamat nila sa Indonesian government dahil mapapauwi na ang kanyang ina.
Ibinahagi ni Darren Veloso Candelaria na isang taon at apat na buwan lamang siya nang makulong ang kanyang ina sa Indonesia.
“Nagpapasalamat po ako sa Indonesian government dahil po sa wakas po makakalaya na yung mama ko,” ani Darren sa panayam ng News5.
“Mararanasan ko na pong magkaroon ng nanay,” dagdag pa niya.
ALIH PEREZ
Related posts:
DEATH ROW CONVICT JANE VELOSO MAILILIPAT SA PH JAIL
(Ph nagpasalamat sa Indonesia) VELOSO MAPAPAUWI NA
PAG-UWI NI VELOSO PINOPROSESO NA
CLEMENCY KAY VELOSO PAG-AARALAN NI PBBM
VELOSO EXCITED SA PAG-UWI
VELOSO MAY LAYANG PUMILI NG JAIL FACILITY SA PH
PH AT INDONESIA LUMAGDA NA SA PAGLILIPAT KAY VELOSO
VELOSO MAKAKAUWI BAGO ANG PASKO