MULING nadominahan ng Choco Mucho ang Kansai University of Social Welfare ng Japan sa apat na
sets, 25-20, 23-25, 25-13, 25-18, upang kunin ang bronze medal sa 2023 VTV International Women’s Volleyball Cup noong Sabado sa Vietnam.
Inangkin ng Vietnam 1 ang gold medal makaraang pataubin ang Vietnam 2 sa finals, 25-18, 18-25, 25-12, 22-25, 15-5.
Isang double-block nina Chery Nunag at Caitlyn Viray ang naghatid sa Flying Titans sa match point, 24-18, bago kumana si Isa Molde ng service ace para sa game-winning point.
Naunang tinalo ng Choco Mucho ang Japanese club sa pagsisimula ng kanilang kampanya noong nakaraang linggo.
Kuminang sina Sisi Rondina at Maddi Madayag para sa Flying Titans at itinanghal na Best Outside Spiker at Best Middle Blocker, ayon sa pagkakasunod.
