WALANG VIP SA VACCINATION SA MAYNILA

NANAWAGAN si Manila Mayor Isko Moreno sa kanyang nasasakupan na pantay-pantay lamang ang turing sa lahat kung pagbabakuna ang pag-uusapan kaya walang puwang ang aniya’y ‘feeling privileged’.

“For those who are “feeling privileged,’ be it known that we are certain about our rules,” ayon sa alkalde saka pinuri ang vaccinating teams ng lungsod sa kanilang sakripisyo sa gitna ng kasalukuyang malawakang pagbabakuna.

Pinayuhan din ni Moreno ang mga vaccinating teams na huwag bigyang pansin ang mga nagpapakita ng sense of entitlement at binabali ang umiiral na batas sa pagbabakuna para lamang mauna sa pila.

Kaugnay nito ay muling nalagpasan ng pamahalaang lungsod ang sarili nitong record sa pangatlong pagkakataon nang makapagtala ito ng kabuuang 16,261 na dami ng nabakunahan sa loob ng isang araw.

Ang vaccinating teams ng lungsod sa pamumuno ni Vice Mayor Honey Lacuna at Manila Health Department (MHD) chief Dr. Arnold Pangan ay nagtatrabaho sa loob ng 14 – oras kada araw simula alas-6 ng umaga hanggang alas-8 ng gabi upang makapagbakuna ng mas maraming tao sa 18 designated sites.

Ang pahayag ng alkalde ay kaugnay ng isang social media post kung saan ang isang netizen ay nagrereklamo na hindi siya nabakunahan matapos na makatanggap ng text message. Sinasabi ng netizen na siya ay may comorbidity pero hindi siya nagdala ng katibayan na nire-require sa itinakdang reglamento ng Department of Health (DOH) na siyang nagsu-supply ng bakuna sa mga local government units.

Matatandaang dinek­lara ni Moreno na pagdating sa pagbabakuna ay walang holiday sa Maynila at tuloy-tuloy lamang ang bakuna, kahit Sabado at Linggo at pinahaba rin sa 14-oras ang operasyon sa lahat 18-vaccination sites mula alas-6 ng umaga hanggang alas-8 ng gabi. VERLIN RUIZ