TATANGGAP sina World Championship medalists Carlos Yulo at EJ Obiena, kasama ang history maker Philippine women’s football team, ng Major Awards sa San Miguel Corporation-Philippine Sportswriters Association (SMC-PSA) Awards Night sa grand ballroom ng Diamond Hotel sa susunod na buwan.
Nakopo ni Yulo ang silver at bronze sa men’s vault at parallel bars sa 51st FIG Artistic Gymnastics World Championships sa Liverpool England, habang naitala ni Obiena ang bagong Asian-high mark na 5.94 meters tungo sa pagsikwat ng historic bronze sa World Athletics Championships sa Oregon.
At ang Filipinas? Nakuha nila ang kauna-unahang ticket sa FIFA Women’s World Cup kasunod ng third place finish sa AFC Women’s Asian Cup sa ilalim ni coach Alen Stajcic.
Labindalawang iba pa ang tatanggap ng Major Awards sa March 6 gala night.
Makakasama nina Yulo, Obiena, at Filipinas sina boxer Carlo Paalam, jui-jitsu bets Meggie Ochoa at Kimberly Anne Custodio, karateka Junna Tsukii, pool players Rubilen Amit, Carlo Biado, at Johann Chua, weightlifter Vanessa Sarno, ang volleyball duo nina Jovelyn Gonzaga at Sisi Rondina, Esports organization Blacklist International, jockey Jessie Guca, at champion horse Boss Emong.
Ang kauna-unahang Olympic gold medalist ng bansa na si Hidilyn Diaz ang tatanggap ng coveted Athlete of the Year award sa ikalawang sunod na pagkakataon.
