2 KATAO, MENOR, TIMBOG SA WEEDS

TATLO katao kabilang ang isang menor ang naaresto ng pulisya matapos mahulihan ng 4 na kilo o mahigit P60,000 halaga ng marijuana kagabi sa Tondo.

Kasalukuyang nakapiit sa detention cell ang mga suspek na sina alyas John, 18, residente ng Tondo; Marvin Maui Canlas, 23, at kapatid nito na 15 taong gulang at kapwa nakatira sa nasabi ring lugar.

Ayon kay Supt. Reynaldo Magdaluyo, hepe ng Manila Police District -Raxabago Station (PS 1), nasa 4 na kilo ang marijuana na nakumpiska ng Station Drug Enforcement Unit sa Perla St., corner N. Zamora St., Tondo, Maynila dakong alas-7:00 ng gabi.

Nabatid na ikinasa ang operasyon matapos ituro si Marvin nang isa pang suspek na nauna nang naaresto dahil sa 1 kilo ng marijuana kama­kailan.

Itinuturong supplier si Canlas ng marijuana na umano’y kinukuha pa mula sa Kalinga.

Hindi naman itinanggi ni Canlas ang nakuhang marijuana habang  ang magkapatid ay wala umanong kina­laman o partisipasyon sa transaksiyon ni Canlas.

Sasampahan ng kasong paglabag sa Republic Act 9165 o Comprehensive Dangerous Drugs Act ang 2 suspek habang ite-turn over naman sa kustodiya ng Manila Social Welfare Development Office ang menor. PAUL ROLDAN