ALBAY – BULAGTA ang dalawang miyembro ng militanteng grupo na Karapatan makaraang pagbabarilin ng riding-in-tandem assas-sins sa bahagi ng Phase 2 Seabreeze Homes Subd. sa Barangay Cabid-an, Sorsogon City, kahapon ng umaga.
Kapwa napuruhan sa katawan ang mga biktimang sina Ryan Hubilla, senior highschool student, residente ng Brgy.Trece Martirez; at Nelly Bagasa-la, residente naman sa bayan ng Barcelona, Sorsogon.
Sa inisyal na ulat ng pulisya na nakarating kay P/Col. Bong Buslig, provincial director ng Sorsogon Police, naganap ang pananambang dakong alas-8:50 ng umaga habang nakasakay ang dalawa sa traysikel na minamaneho ni Jose Romero Beriña.
Lumilitaw na pababa na sana ang dalawa nang ratratin ng tandem assassins kung saan hindi naman nadamay ang driver ng traysikel.
Samantala, kinumpirma naman ni Vince Casilihan ng Bayan-Bicol na kapwa staff ng Karapatan-Sorsogon ang mga biktima na sinasabing nagtungo lamang sa nabanggit na lugar dahil may kakausapin ding miyembro ng Karapatan.
Kinondena naman ng grupong Karapatan sa Bicol ang naganap na pagpatay sa dalawa nilang miyembro habang patuloy namang iniimbestigahan ng pulisya ang naganap na insidente. MHAR BASCO
Comments are closed.