VALENZUELA CITY – NASAKOTE ang dalawang hinihinalang sangkot sa ilegal na droga kabilang ang hairstylist na nasa drug watchlist matapos maaktuhan ng mga pulis na nag-aabutan ng droga sa lungsod na ito.
Personal na kinilala ng bagong talagang hepe ng Valenzuela City Police na si P/Col. Carlito Gaces ang naarestong mga suspek na si Jordan Tanaun alyas “JM”, 28, (listed pusher) ng Blk 3 Bukid Malinta at Jeffrey Gadi alyas “Paula”, 29, ng Phase 1, Bagbaguin Caloocan City.
Lumitaw sa isinagawang imbestigasyon ni PSSgt Carlos Erasquin Jr., alas-4:25 ng madaling araw nang maaktuhan nina PSSg Rolando Magno Jr. at PCpl Mario Martin III ng Station Drug Enforcement Unit (SDEU) si Tanaun na may inaabot na isang plastic sachet ng hinihinalang shabu kay Gadi sa Maysan Road, malapit sa lumang city hall.
Kaagad sinunggaban ni PSSG Magno ang mga suspek at narekober kay Tanaun ang dalawang plastic sachet ng shabu at P200 bill habang nakuha naman kay Gadi ang isang sachet ng shabu. EVELYN GARCIA
Comments are closed.