25K JOBS INALOK SA SUBIC PARA SA BUILD BUILD BUILD PROGRAM

LIBO-LIBONG nag­hahanap ng trabaho ang du­magsa sa isang  job caravan na idinaos sa Subic Bay Metropolitan Authority (SBMA) Gym kahapon.

Tinatayang 25,000  trabaho ang inaalok sa job fair   para sa construction project ng gobyerno  sa ilalim ng  programang Build  Build Build.

Nagsimula alas-8:00 ng umaga at natapos ng alas-4:00 ng hapon ang job fair   at kasama sa mga  nagbaka-sakali rito  ay ang  mga  empleyado ng  Hanjin Heavy Industries and Construction Philippines  na   natanggal sa trabaho at ang iba pa na  nahaharap   sa retrenchment  matapos na magdeklara ang  shipbuilder  ng pagkalugi.

Kabilang sa job vacancies ay ang  construction workers, welders, carpenters, engineers, at administrative staff.

Ayon naman kay SBMA Chairman and Administrator Wilma Eisma,  masaya sila na kasama sa proyekto ang Subic.

“Subic is happy to be part of this project to bring greater positive social impact to our people. We are committed to find every opportunity for the SBMA to make more jobs available and catalyse greater growth in Central Luzon and the rest of the country,”  ang pahayag ni Eisma.

Sinabi ni Department of Labor and Employment (DOLE) Secretary Silvestre Bello III na 77 kompanya ang nag-alok ng trabaho para sa lahat ng skilled jobseekers. BENJARDIE REYES