3 BUWANG PRICE FREEZE

NANAWAGAN si Senadora Imee Marcos na sa halip na itaas ang ­presyo ng mga pangunahing bilihin ay magpatupad na lamang ng ‘price freeze’ hanggang sa Disyembre.

Ayon kay Marcos, kailangang maghigpit ang Department of Trade and Industry (DTI) sa mga mapagsamantalang negosyante at itigil na muna ang planong pagtataas ng presyo ng mga pangunahing bilihin lalo na sa panahon ng Kapaskuhan.

“Stop na muna ang taas-presyo sa mga pa­ngunahing bilihin kahit ngayon man lamang panahon ng Kapaskuhan. Hindi naman si­guro makaaapekto ito sa higanteng tubo ng mga negosyante kum­para sa maliit na sahod na tinatanggap ng mga simpleng empleyado,” pahayag ni Marcos.

Sinabi ni Marcos na ang planong bagong suggested retail price o SRP ngayong Kapaskuhan ay hindi makatuwiran at hindi makatao, at nagpapakita lamang na ang DTI ay higit na pinapaboran ang mga negosyante kaysa ma­liliit na mamimili.

Anang senadora, ang kawalan ng matibay na batayan ng mga negosyante para itaas ang halaga ng kanilang produkto ay sapat na dahilan para hindi payagan ng DTI ang taas-presyo na nakaamba sa mga pangunahing bilihin ngayong Christmas season.

“Kung tutuusin, halos three months lang naman ang price freeze at napakalaking tulong ito sa lahat ng mga mahihirap nating mga kababayang mamimili. Sa tingin ko naman, makapaghihintay ang mga negosyante sa kanilang gagawing price increase,” paliwanag pa ni Marcos.

Bukod sa sardinas, kape, noodles, asukal, mantika, gatas, sabon, tinapay, soy sauce, suka, itlog at mantika, ni­linaw rin ni Marcos na ang ‘price freeze’ ay dapat ding maipatupad sa bigas, isda, manok, baka at maging sa baboy.    VICKY CERVALES