3 PANG PINOY PASOK SA TOKYO PARALYMPICS

TATLONG Filipino para-athletes ang nakakuha ng puwesto sa Tokyo Paralympics.

Ayon kay Philippine Paralympic Committee secretary general Walter Torres, sina wheelchair racer Jerrold Mangliwan, discus thrower Jeanette Aceveda, at swimmer Gary Bejino ay binigyan ng bipartite slots na nagpormalisa sa kanilang Paralympic stints.

Ang  Bipartite Commission Invitation ay isang qualification method para sa para-athletes na hindi nagkaroon ng pagkakataong magkuwalipika para sa Paralympics dahil sa “extraordinary circumstances.”

Nahigitan ni Mangliwan, nasa kanyang ikalawang sunod na Paralympic appearance makaraang sumabak sa  2016 Rio Games, ang Paralympic qualifying standard time sa 400-meter T52 wheelchair race sa 2021 World Para Athletics Grand Prix na idinaos noong nakaraang buwan sa  Nottwil, Switzerland.

Naabot din ni Aceveda, na inaasahang lalahok sa women’s F11/12 discus throw event sa Tokyo, ang Paralympic qualifying standard time sa isa sa kanyang mga torneo.

Sinabi pa ni Torres na binigyan din ang Filipinas ng dalawang bipartite slots, isa sa bawat gender, sa para-athletics.

Samantala, nakopo ni Bejino ang bipartite slot makaraang makatugon sa minimum Paralympic qualifying time sa kanyang silver medal finish sa men’s S6 200-meter individual medley event ng 2018 Asian Para Games

Sinabi ni coach Tony Ong sa CNN Philippines na sasabak din si Bejino sa  400-meter freestyle, 100-meter backstroke, at 50-meter butterfly S6 events sa Tokyo.

Sasamahan ng tatlo sina swimmer Ernie Gawilan at taekwondo jin Allain Ganapin sa Tokyo Paralympics na nakatakda sa  Aug. 24-Sept. 5.

Related posts:

5 PINOY NA ANG PASOK SA TOKYO PARALYMPICS BEJINO SASALANG NA SA TOKYO PARALYMPICS PINOY JIN GANAPIN PASOK NA SA TOKYO PARALYMPICS KAMPANYA NG PINOY PARA ATHLETES SA TOKYO APEKTADO NG COVID-19 PANDEMIC 72 PH ATHLETES SASABAK SA ASIAN PARA GAMES PARALYMPICS: MANGLIWAN BIGONG MAKASUNGKIT NG MEDALYA BEJINO SABAK ULIT SA PARALYMPICS PINOY GOLFER ATAT NANG HUMAMBALOS