GENERAL SANTOS CITY- PITO katao ang dead on the spot habang anim na iba pa ang sugatan sa karambola ng tatlong sasakyan na kinabibilangan ng commuter van, wing truck at Raptor Ford sa Purok 4 National Highway, Brgy. Batomelong sa lalawigang ito.
Ayon kay Police Major Rise Hernaes ng Gensan Police Public Information Office, naganap ang sakuna kahapon ng alas-3:15 ng hapon.
Ang mga sangkot na sasakyang ay HiAce van na nagsisilbing commuter van, wing truck at isang Raptor Ford na nagmistulang nilamukot na papel makaraang magbanggan.
Ang pitong nasawi at anim na sugatan ay sakay ng commuter van habang hindi naman idinetalye kung ano ang sinapit ng driver o sakay ng wing truck.
Nag-ugat ang sakuna nang sumabog ang kaliwang gulong ng commuter van dahilan para mawalan ito ng kontrol at banggain ang kasalubong na dalawang sasakyan. EUNICE CELARIO