5 PINOY NA ANG PASOK SA TOKYO PARALYMPICS

UMAASA ang Philippine Sports Commission (PSC) na mapapantayan o mahihigitan pa ng Filipinas ang maipadadalang Paralympians sa 2021 Tokyo Paralympics matapos na makasiguro na ng puwesto ang limang Pinoy  athletes.

Sinabi ni PSC Commissioner Arnold Agustin na naghihintay pa sila sa Tripartite Agreement na ilalabas para sa tatlong sports events — cycling, para-power lifting at table tennis — para samahan sina Allain Ganapin (Para-Taekwondo), Jerrold Mangliwan (Para-Athletics, wheelchair racer), Jeanette Aceveda (Para-Athletics, discuss thrower), Ernie Gawilan (Para/Swimmiing) at Gary Bejino (Para-Swimming).

“Silang lahat ay dumaan sa standard qualifying event, so napakahirap ng pagka-qualify nila,” wika ni Agustin, Huwebes ng umaga sa TOPS Usapang Sports on Air.

“Mayroon pa tayong inaabangan by Tripartite Agreement dun sa ating cycling at sa para-power lifting, bale inaabangan pa rin natin hopefully mapili rin sila,” dagdag ni Agustin na umaasang mapapantayan ang anim na naipadala sa 2016 Rio Paralympics o mahigitan pa ito. Ang Paralympiad ay idaraos sa Agosto 24 hanggang Setyembre 5 sa Tokyo, Japan.

“So, we’re still waiting sa tatlong events na iyon, hopefully magkaroon pa ng dagdag, kasi nung last Rio Olympics, 6 ‘yung nag-qualify natin eh, so right now 5 pa lang, maganda sana kung equal o madagdagan pa natin sa Tokyo Olympics,” sabi ni Agustin.

Sinabi rin ni Agustin na may tsansa na muling makabalik sa Olympiad si 2016 Rio Olympics singles class 8 bronze medalist at 7-time ASEAN Para Games champion Josephine Medina sakaling mag-back out ang kasalukuyang world number 1 sa kanyang kategorya

“Although hindi siya (Medina) na-invite via partite, bale No.2 siya, just in case na mag-back out ‘yung No. makakapasok siya automatic,” ani Agustin, kung saan tinuldukan ng 51-anyos na two-time Asian Para Games silver medalist ang 16 na taong pagkagutom sa medalya sa Paralympic Games na huling kinuha ni para-power lifter Adeline Dumapong sa 2000 Sydney Paralympics sa kanyang bronze medal sa women’s under-82.5kgs category.

Naniniwala si Agustin na malaki ang tsansa na makapag-uwi ng medalya  sa Paralympiad ang 7-time ASEAN Para Games gold medalist at triple Asian Para Games champion na si Gawilan, gayundin ang iba pang mga sasabak sa 16th edition sa capital city ng Japan.

Related posts:

3 PANG PINOY PASOK SA TOKYO PARALYMPICS PINOY JIN GANAPIN PASOK NA SA TOKYO PARALYMPICS BEJINO SASALANG NA SA TOKYO PARALYMPICS 72 PH ATHLETES SASABAK SA ASIAN PARA GAMES KAMPANYA NG PINOY PARA ATHLETES SA TOKYO APEKTADO NG COVID-19 PANDEMIC RIO PARALYMPICS MEDALIST MEDINA PUMANAW NA RIO PARALYMPICS MEDALIST MEDINA BINIGYANG-PUGAY ATLETANG PINOY DAPAT MAISAMA SA LOCAL ABSENTEE VOTING