6 ARESTADO SA BARIL AT SHABU

CALOOCAN CITY – ANIM na hinihina­lang sangkot sa ilegal na droga ang arestado ng pulisya sa buy bust at drug operation sa magkahiwalay na lugar sa lungsod na ito.

Ayon kay Caloocan Police Chief P/Col. Noel Flores, alas-2 ng hapon nang ikasa ng mga ope­ratiba ng SDEU at PCP-3 sa pangunguna ni P/Maj. Jhobie Astucia ang buy bust operation kontra kay Jayson David alyas “Kalbo”, 29, sa Phase 3 Pkg 2 Blk 52 Lot 4 Brgy. 176, Bagong Silang.

Matapos iabot ni Kalbo ang isang sachet ng shabu sa undercover na pulis na nagpanggap na buyer kapalit ng P500 marked money ay agad itong dinakma, kasama si Joey Llahto, 37, user, Levy Salvatierra, 28, user at Don Laurence Villanueva, 23, pusher.

Narekober kay Kalbo ang buy bust money, dalawang sachet ng shabu at dalawang zip lock na naglalaman ng pinatuyong dahon ng hinihinalang marijuana habang nakuha naman sa iba pang suspek ang apat na sachet ng hinihinalang shabu.

Bandang alas-4 naman ng hapon nang maaktuhan ng mga pulis si Dandy Borromeo alyas “Alamat” at Regie Soriano na bumabatak sa loob ng isang bahay sa Phase 38, Package 2, Block 17, Lot 22, Brgy 176, Bagong Silang.

Nakumpiska sa nasabing bahay ang dalawang selyadong sachet ng shabu, isang nakabukas na sachet ng shabu, ilang drug paraphernalia na may bahid ng shabu at isang Magnum 22 at limang bala nito. EVELYN GARCIA