PITONG hinihinalang sangkot sa droga kabilang ang isang babae ang naaresto sa buy bust operation ng mga pulis sa Navotas City, kahapon ng madaling araw.
Kinilala ni Navotas Police Chief Sr. Supt. Ramchrisen Haveria Jr. ang mga naarestong suspek na sina Eduardo Rosal alyas “Michael Buang”, 34, Robinson Medina, 24, Dixie Baron, 23, pawang ng Market 3, Brgy. NBBN at Rossel Magos, 25 ng Brgy. 12, Caloocan City.
Ayon kay Sr. Supt. Haveria, alas-1:40 ng madaling araw nang isagawa ng mga operatiba ng Station Drug Enforcement Unit (SDEU) sa pangunguna ni PSI Mark Flores sa kooperasyon sa Navotas Maritime Police ang buy-bust operation kontra sa mga suspek sa Market 3.
Isa sa mga operatiba na nagpanggap na buyer ang nagawang makabili ng dalawang plastic sachet ng shabu sa mga suspek kapalit ng P1,000 marked money at pagkatapos ng transaksiyon, agad lumusob ang nakaantabay na mga operatiba saka inaresto ang mga suspek.
Pitong plastic sachets na naglalaman ng hindi pa mabatid na halaga ng shabu at buy bust money ang narekober sa mga suspek.
Habang nagaganap ang operasyon, naaktuhan naman ng iba pang operatiba na nakaposisyon bilang perimeter security sa madilim na bahagi ng Market 3, na sumisinghot ng shabu sina Hilario Ducos, 20, Richard Garado, 33, at Reynaldo Esgana, 22, pawang ng Market 3.
Nakuha sa mga ito ang isang nakabukas na plastic sachet na may bahid pa ng hinihinalang shabu at ilang drug paraphernalias. EVELYN GARCIA
Comments are closed.