Laro ngayon:
(Araneta Coliseum)
6:30 p.m.- Ginebra vs Meralco
Game 3, Serye tabla sa 1-1
MAG-AAGAWAN ang Barangay Ginebra at Meralco sa 2-1 bentahe sa Game 3 ng best-of-7 PBA Governors’ Cup Finals ngayon sa Araneta Coliseum.
Magsasagupa ang Gin Kings at Bolts sa alas-6:30 ng gabi kung saan kapwa determinado ang dalawang koponan na makopo ang panalo at lumapit ng dalawang hakbang sa pagkopo ng korona.
Nanalo ang Barangay Ginebra sa Game 1, 91-87, subalit gumanti ang Meralco sa Game 2, 104-102, sa Quezon Convention Centre sa Lucena upang itabla ang serye sa 1-1.
Gumawa ang Meralco ng 16 three points, tatlo kay Baser Amer na umiskor ng 17 points upang muling tanghaling ‘Best Player of the Game’.
Muntik nang maulit ang nangyari sa Meralco sa Game 1 kung saan bumigay ang tropa ni coach Norman Black sa huli at nanalo ang Barangay Ginebra via come-from-behind.
Sa Game 2 ay naisalba ng pinagsanib na puwersa nina import Allen Durham, Baser Amer at Raymond Almazan ang Bolts upang mapigilan ang Kings sa pagkuha ng 2-0 lead.
Sa panalo ay napunta ang momentum sa Meralco at tiyak gagamitin ito ni coach Norman Black bilang tuntungan upang makaangat sa tropa ni coach Tim Cone.
“The win is very important to us. They are energized and hell-bent to win Game 3. We will take advantage and exploit the momentum to the hilt,” sabi ni Black matapos na maitabla ang serye.
Muling sasandal si Black kina Durham, Amer, Almazan, Antonio Jose Caram, Chris Newsome, Cliff Hodge, Kier John Quinto, Nico Salva at John Pinto.
“It’s a heart breaking loss. We lost game before the very eyes of our legion of fans in this province. We tried and played hard but breaks went against us when the game was on the line,” malungkot na pahayag ni Cone.
“We’ll bounce back in Game 3. We studied and analyzed where we failed. We applied corrected measures and put premium on offense and defence,” dagdag ni Cone na target ang kanyang ika-22 titulo magmula noong 1991.
Magiging sandigan naman ng Ginebra sina Justine Brownlee, LA Tenorio, Stangley Pringle, Scottie Thompson at twin towers Japeth Aguilar at Greg Slaughter. CLYDE MARIANO
