ANDREA TORRES NAKABITIN NG PATIWARIK KUNG MAG-EXERCISE

MATINDING hamon para sa sexy Kapuso actress na si Andrea Torres ang pinasok na bagong ehersisyong ginagawa niya ngayon ang ‘anti-gravity yoga’. Isang klase nang exercise kung saan ay nakabitin ng patiwarik ang isang tao habang nag-e-exercise. Mabigat na hamon ito kay Andrea pero hindi niya ito inatrasan at ginawa ang naturang makabagong ehersisyo. May mild slipped disc si Andrea, isang klase ng sakit sa buto, specifically sa spinal cord.

Alam din ni Andrea na sa kanyang pag-eehersisyo ng anti-gravity yoga ay nangangahulugan na para siyang magbubuhat ng ilang kilong bigat. Isa sa pinakakaingatan ni Andrea sa kanyang sakit ay ang pagbubuhat ng mabigat pero dahil sa paniniwalang malaking tulong sa paggaling ng kanyang mild slipped disc ay ginawa ito ni Andrea at naibigan naman ng sexy actress ang bagong exercise.

Sa ngayon ay patuloy na muna si Andrea sa mga exercises niya para sa pagpapaganda ng katawan at kalusugan habang nag-aantay pa ng bagong teleseryeng gagawin sa Siyete pagkatapos ng “Victor Magtanggol” nila ni Alden Richards.

MEGAN YOUNG AT MIKAEL DAEZ NAGKASAL-KASALAN

KASAL na lang talaga ang kulang sa magsyotang sina Mikael Daez at Megan Young, marami na rin naman ang nagtatanong kung kailan magpapakasal ang dalawa lalo pa nga’t halatang-halata na sobrang pagmamahalan nila sa isa’t isa. Marami rin ang na­bigla nang malaman na going 7 years na ang relasyon ng dalawa, eh kasi nga naman last year lang silang umamin na mag-on at tinago nila ang relasyon kahit pa naging Miss World si Megan ay tahimik ang relasyon ng dalawa.

Pero tsika ng bunsong kapatid ni Megan na si Lauren Young ay nagkasal-kasalan ang dalawa. At si Megan pa raw ang bumili ng kanyang wedding gown at ang kasal ay nangyari sa isang online game, kung saan nawiwili ang dalawa, ang ‘Ragnarok M: Eter-nal Love’.

At sa naturang mobile game ay may karakter sila Megan at Mikael at doon ay nagpakasal ang kanilang karakter kung kaya kilig na kilig itong naikuwento ni Megan sa kanyang kapatid na si Lauren.

Si Lauren ay mapapanood sa “Hiram Na Anak” bilang palaban na ‘other woman’ ni Paolo Contis. Kasama rin sa “Hiram na Anak” sina Yasmien Kurdi, Dion Ignacio, Empress Schuck at marami pang iba.