(Aprub na sa Kamara) TAX EXEMPTION SA HONORARIA NG POLL WORKERS

LUSOT na sa Mababang Kapulungan ng Kongreso ang panukala na nag-eexempt sa pagpapataw ng income tax sahonoraria, allowances at iba pang benepisyo ng poll workers.

Sa botong 202-0-0, inaprubahan na ng Kamara ang House Bill 9652 na inisponsoran ni ACT Teachers Partylist Rep. France Castro.

Ayon kay Castro, mahaba na ang panahong itinakbo ng panukala kaya nagagalak sila sa tuluyang pagpasa nito.

“Talagang napakahaba na ng itinakbo ng kampanya para sa makataong kompensasyon at makabuluhang pagkilala sa mga paghihirap at sakripisyo ng libo-libong guro at ibang mamamayan na nagbo-volunteer tuwing eleksiyon,” pahayag ni Castro.

Ang mga guro ang kadalasang nagsisilbing Boards of Election Inspectors sa araw ng halalan para pangasiwaan ang actual voting sa mga presinto. Kasama rin sila sa pagbibilang, canvassing at transmission ng resulta ng botohan.

Muling iginiit ng kongresista na walang legal na basehan ang direktiba ng Bureau of Internal Revenue (BIR) na patawan ng buwis ang benepisyo ng poll workers.

“Hindi dapat bawasan pa ang kakarampot nang honoraria, travel allowances, at iba pang benepisyong tinatanggap ng mga sinusuong ang iba’t ibang panganib para lamang itaguyod ang halalan at protektahan ang mga boto ng sambayanang Pilipino,” ani Castro.

“Dapat nga ay taasan pa ang mga benepisyong ito, kaya kaakibat ng HB 9652 ang panukalang irebyu ng Comelec ang halaga ng honoraria, travel allowance, at mga compensation package na nasa ESRA.  Limang taon na ang lumipas matapos ipasa ang batas pero hindi pa ini-increase-an ang mga benepisyo sa kabila ng mandato sa Comelec na irebyu at ipanukala ang pagtaas ng mga ito,” dagdag ng lady solon.

Related posts:

(Aprub na sa Kamara) TAX EXEMPTION, SUBSIDIY SA CREATIVE INDUSTRY (Itinutulak sa Kamara) TAX HOLIDAY SA HEALTH WORKERS (Isusulong sa Kamara) TAX BREAK SA MAGHA-HIRE SA EX-PDLS (Aaksiyunan ng Kamara) INCOME TAX NG PRIVATE SCHOOLS (Isinusulong sa Kamara) TAX-FREE SA REWARDS NG NAT’L ATHLETES (Isinusulong sa Kamara) TAX EXEMPTION SA MEDICAL OXYGEN, SUPPLIES (Lusot na sa Kamara) 1% INCOME TAX SA PRIVATE SCHOOLS (Aprub na sa Kamara) TAX EXEMPTION SA MEDICAL SUPPLIES, OXYGEN