BARBOSA PASOK SA OLYMPICS

PASOK na sa 2021 Tokyo Olympics si Filipino taekwondo jin Kurt Barbosa makaraang gulantangin si hometown bet Zaid Alhalawani sa Asian Olympic Qualification Tournament sa Amman, Jordan.

Ang dating University Athletic Association of the Philippines’ Most Valuable Player ay mainit na naghabol upang maungusan si Al-Halawani, 50-49, sa under-58 kilogram semifinals noong Sabado.

Sa kanyang panalo, si Barbosa ang nag-iisang Filipino taekwondo bet na sasabak sa Tokyo. Siya rin ang ika-9 na Filipino athlete na nag-qualify sa international sporting meet.

Ang top two taekwondo jins lamang kada division ang makakakuha ng tickets sa Tokyo Games, na nangangahulugan na kailangang manalo ng isang atleta sa semifinals.

Naging mahirap ang laban sa  men’s -58kg. division semifinals para kay Barbosa, na naghabol ng hang-gang 15 points.

Sa huling 12 segundo ng laro ay tila makukuha ni Alhalawani ang Olympic slot kung saan tangan niya ang 49-44 lead. Ngunit umiskor si Barbosa ng tatlong sunod na valid kicks laban kay Alhalawani upang agawin ang Olympic berth

Bago nakasagupa si Alhalawani ay pinataob ni Barbosa si Mongolia’s Tumenbayar Molom, 40-33, sa quarterfinals.

Samantala, bigo ang dalawang  Filipina taekwondo jins na makakuha ng tiket sa Tokyo Games.

Nagkasya si 2016 Rio Olympics veteran Kirstie Alora sa  third place sa women’s +67kg. division matapos ang 9-7 victory kontra Tajikistan’s Mokhru Khalimova sa bronze medal match.

Makaraang mamayani kay Syria’s Aya Aljrayhe, 22-0, sa round-of-16, kinapos si Pauline Lopez kay  Lebanon’s Laetitia Aoun, 10-21, sa quarterfinals.

Bukod kay Barbosa, ang iba pang Filipino athletes na pasok na sa Tokyo Olympics ay sina 2016 Rio Olympics silver medalist at weightlifter Hidilyn Diaz, gymnast Carlos Yulo, pole vaulter EJ Obiena, row-er Cris Nievarez, at boxers Nesthy Petecio, Carlo Paalam, Eumir Marcial, at Irish Magno.

Gaganapin ang Tokyo Olympic Games sa July 23 hanggang August 8.

Related posts:

PAGUNSAN SA TOKYO OLYMPICS DIDAL TODO PAGHAHANDA SA OLYMPICS OBIENA, OLYMPIC CHAMP SALO SA GOLD SA GERMANY GOODBYE, OLYMPICS! (Gilas tinambakan ng Dominican Republic) DUTERTE INIMBITAHAN SA TOKYO OLYMPICS YULO IBIBIGAY ANG UNANG GINTO NG PH SA OLYMPICS FEDERER UMATRAS SA OLYMPICS OLYMPICS MEDAL-WINNING BOXERS PARARANGALAN SA KAMARA