(Bukas na sa Metro Manila tourist) TRAVEL PASS SA DADAYO SA TAGAYTAY

NANINIWALA ang Joint Task Force  CO­VID Shield na magsilbing ‘blueprint’ sa pagbuhay muli ng turismo ang Tagaytay City makaraang buksan ito sa mga Metro Manila tourist at mga kalapit lalawigan.

Kasabay nito, nakipag ugnayan kahapon si P/Lt. Gen. Guillermo Elea­zar, Commander ng JTF COVID Shield kay  Tagaytay City Mayor Agnes Tolentino para talakayin ang mga hakbangin at plano sa pangangalaga at pagkontrol sa galaw ng mga turista  upang matiyak na mapapanatili ang kaligtasan ng mga local resident at mga bisita laban sa coronavirus infection sa muling pagbubukas ng Tagaytay City sa mga turista.

“Since Tagaytay City is the first Local Government Unit (LGU) which opened its borders for tourists across the country, Mayor Agnes Tolentino and I both agreed to put things in order to ensure that the local police and the City Government will not be overwhelmed by the possible influx of tou­rists in the coming days,” ani  Eleazar.

At sa pakikipag-ugnayan kay Interior and Local Government Secretary Eduardo Año at Philippine National Police Chief  Camilo Pancratius Casco­lan, mas pinaigting ng Joint Task Force CO­VID Shield at  City Go­vernment of Tagaytay ang pagpapatupad ng travel at  quarantine protocols.

Layon nito, matiyak na ang  travel at iba pang  quarantine protocols na ipinatutupad ay tugma sa alituntunin ng  National Task Force on COVID-19 na pinamumunuan ni  Defense Secretary Delfin Lorenzana habang ipinauubaya sa mga LGUs ang pagpapasya kung paano nila muling pauunlarin ang kanilang ekonomiya dulot ng COVID-19 pandemic.

Binigyang diin ni Eleazar, ang muling pagbubukas ng  Tagaytay City ay nangangahulugan na maari nang maka bisita o dumayo ang mga tao mula sa ibang bahagi ng bansa ng walang travel authority maliban sa mga naninirahan sa lugar na nasa ilalim ng general community quarantine (GCQ) o mas mataas na  community quarantine status.

“Local tourists who would come from areas under the general community quarantine (GCQ), modified enhanced community quarantine (MECQ) and enhanced community quarantine (ECQ) are still required to secure a Travel Authority,” giit ni  Eleazar.

Iginiit nito, tanging ang mga nagmula sa mga lugar na nasa modified general community qua­rantine (MGCQ) o walang  community quarantine status ang pinapayagang pumasok sa Tagaytay City nang hindi na kailangan pa ng travel authority.

Gayundin, nilinaw ni Tolentino na mahigpit pa rin nilang ipinatutupad ang health safety protocols sa kanilang lugar  kagaya ng pagsusuot ng face mask at face shield at pagpapa iral ng tamang physical distancing. VERLIN RUIZ