COMELEC SPOX NAG-REACT KAY LIZA SOBERANO

NAGBIGAY ng reaksiyon si Commission on Elections (Comelec) Spokesperson James Jimenez sa mga tweet ng aktres na si Liza Soberano hinggil sa kanyang pag-aalala sa sitwasyon ng mga mahihirap na Pinoy ngayong nagkakaroon ng bagong surge ng mga kaso ng coronavirus disease (COVID-19) sa bansa.

Ito’y matapos na isang netizen ang magtanong kay Jimenez kung rehistradong botante ba si Soberano, na kilalang ipinanganak sa Estados Unidos.

Sa kanyang Twitter account, sinabi ni Jimenez na hindi niya batid kung rehistradong botante si Soberano ngunit pinuri ito dahil kita naman aniya na may malaking pusong Pinoy ito.

“I dunno if @lizasoberano is a registered voter. I aim to ask her tho,” tweet ni Jimenez, bilang tugon sa tanong ng netizen. “Even if she weren’t, she’s obviously got a huge Filipino heart, and lots of people would be made aware of the power of their right to vote if she wanted to exert effort for that. #MagparehistroKa.”

Nauna rito, nag-tweet si Soberano at nagpahayag ng pag-aalala sa kalagayan ng mga Pinoy ngayong tumataas muli ang COVID-19 cases.

“My heart bleeds for all the people who cannot afford not to go out and work. They literally have to choose between dying of starvation or dying of covid. Is our country really this poor to not be able to provide stimulus? Genuine question lang po,” tweet ng aktres.

Ikinumpara pa ng aktres ang Filipinas sa Estados Unidos, kung saan nakatakda na aniyang magbigay ng ‘third wave’ ng stimulus packages sa mga mamamayan, kasabay ng pagkuwestiyon sa suporta ng pamahalaan ng Filipinas sa mahihirap.

“Hayy I honestly don’t even know if my tweets/my voice is actually doing anything. We can only pray for compassion now,” hinaing pa niya.

Tinugon naman ni Jimenez ang naturang tweet ni Soberano at sinabing, “Tweets are great , but VOTING SPEAKS LOUDEST. When you vote, you have a tangible impact by putting good people into office where they can do more to help those in need. Or you can vote people out if you feel new strategies are needed. If you wanna to know more, let’s talk :).”

Kasunod nito, ipinost din ni Jimenez ang pamamaraan sa pagboto at muling hinikayat ang mga kuwalipikadong botante, kabilang na si Soberano, na magparehistro para makaboto sa nalalapit na 2022 national and local elections para makalikha ng impact sa pamahalaan.

“Good morning patriots! And that includes you, Liza. In case you needed reminding, this is how you take the first step in creating an impact on the kind of governance we receive: #MagparehistroKa!” aniya pa.

Nitong Sabado, inianunsiyo na ng Comelec na paiikliin ang voter registration hours at sususpindihin muna ang satellite registration dahil sa pagtaas muli ng mga naitatalang COVID-19 cases sa bansa.

Nabatid na ang voter registration sa mga Office of the Election Officer (OEO), mula Lunes hanggang Huwebes ay mula 8:00AM hanggang 3:00PM na lamang, ngunit ang issuance ng voter’s certification ay hanggang 5:00PM pa rin.

Ang araw naman ng Biyernes ay inilaan ng Comelec sa pag-disinfect ng kanilang mga tanggapan upang matiyak na ligtas mula sa virus ang mga empleyado at mga botanteng magpaparehistro. Ana Rosario Hernandez