CORTEZ ARCHER NA

OPISYAL nang lilipat si Jacob Cortez sa De La Salle University.

Kinumpirma ito ni Jacob sa GMA Integrated News nitong Biyernes, isang araw makaraang ianunsiyo niya ang pag-alis sa San Beda University.

Ang pagsusuot ng berde at puti ay hindi na bago kay Jacob.  Noong high school ay naglaro si Jacob sa La Salle Green Hills bago lumipat sa University of Santo Tomas. Ang kanyang amang si Mike Cortez ay naglaro para sa Green Archers at nagwagi ng dalawang UAAP titles noong 2000 at 2001. Ang Green Archers ang reigning UAAP men’s basketball champions. Gayunman ay hindi agad makapaglalaro si Cortez dahil kailangan niyang pagsilbihan ang kanyang residency sa UAAP Season 87.

Sa NCAA Season 99, si Cortez ay may average na 15.4 points, 3.7 rebounds, at 3.7 assists para sa San Beda. Tinapos ng Red Lions ang seven-year championship drought makaraang pataubin ang Mapua Cardinals sa winner-take-all Game 3 ng  Season 99 finals.