GURO, MISTER NIRATRAT NG RIDING IN TANDEM

NORTH COTABATO-AGAD nasawi ang isang guro at mister nito nang pagbabarilin ng dalawang lalaki lulan ng motorsiklo sa Banisilan.

Kinilala ang mga biktima na sina Angelie Cañete Jamito, 43-anyos, guro sa Pantar Elementary School at mister na si Juanito Flores Romanguera, 56-anyos , tricycle driver at residente ng Brgy. Wadya ng nasabing bayan.

Naganap ang pamamaril sa crossing ng Brgy. Thailand, bandang alas-8:45 ng umaga.

Ihahatid umano ni Romanguera ang misis sa eskwelahan nang dikitan ng nakamotorsiklong mga suspek ang kanilang tricycle.

Mabilis na bumunot ng baril ang backrider at pinagbabaril ang mga biktima at saka tumakas.
Blangko pa ang pulisya sa motibo sa pamamaslang habang patuloy pa rin ang isinasagawang imbestigasyon sa insidente. EUNICE CELARIO