HEALTH EXPERTS PABOR SA MODIFIED LOCKDOWN

NAGBABALA ang medical experts  ng posibleng pagtaas ng mga  kaso ng COVID-19 sa bansa kung tatanggalin ang enhanced community quarantine (ECQ).

Ito ayon kay Senate President Tito Sotto ang paniniwala ng  health experts na kasama sa pulong nila kay Pangulong Rodrigo Duterte para pag- usapan ang susunod na hakbang pagkatapos ng ECQ sa Abril 30.

Gayunman, marami rin aniya  sa health experts ang nagrerekomenda ng modified lockdown extention lalo na sa National Capital Region (NCR).

Sinabi ni Sotto na pinapaboran niya ang modified lockdown dahil marami namang mga lugar ang hindi masyadong apektado at kontrolado ang COVID-19.

Dapat aniyang palawigin ang ECQ sa Metro Manila  subalit kailangan din  lagyan ito ng kaunting modification.

Samantala, maging ang  World Health Organization (WHO) ay nagpahayag sa  mga bansa na huwag biglain sakaling magdesisyon silang tanggalin na ang ipinaiiral nilang lockdown.

Ayon kay Dr. Takeshi Kasai, regional director ng WHO Western Pacific, dapat ay by phase o unti-unti ang gawing pagtanggal sa lockdown.

Napatunayan na aniya na naging epektibo para mabawasan ang pagkalat ng virus ang lockdown kayat hindi maaaring basta na lamang itong tanggalin at ibalik sa normal ang daloy ng buhay. LEN AGUIRRE-DWIZ882