(Hihilingin ng Kamara kay Duterte) 2022 BUDGET SERTIPIKAHANG URGENT

HIHILINGIN ng Mababang Kapulungan ng Kongreso kay Pangulong Rodrigo Duterte na sertipikahang urgent ang panukalang 2022 national budget.

Kinumpirma ito ni House Appropriations Committee Chairman Eric Go Yap sa gitna na rin ng nakatakdang pagsusumite ng Budget Department sa Kamara ng 2022 National Expenditure Program (NEP).

Ayon kay Yap, magiging malaking hamon sa kanila sa Kongreso ang maagang session break sa October 1.

Bukod dito, inaasahang sa August 20 o 23 pa maisusumite ng DBM sa Kamara ang kopya ng panukalang pambansang budget sa 2022.

Sinabi ni Yap na kailangang sa September 29 o 30 ay napagtibay na ng Mababang Kapulungan sa ikatlo at huling pagbasa ang national budget.

Dagdag ni Yap, kailangang matulungan sila ng Ehekutibo upang maaprubahan sa itinakdang petsa ang pambansang pondo kaya hihilingin nila ang sertipikasyon dito ng Pangulo.

Tiniyak naman ni Yap na hindi nila palalagpasin ang paghimay nang husto sa mga budget ng mga kontrobersiyal na ahensiya tulad ng Department of Health, Department of Social Welfare and Development, at Department of Public Works and Highways.

Samantala, tiwala naman si Yap sa kakayahan ng ibang mga opisyal ng DBM at kumpiyansang hindi maaantala ang pagtalakay ng Kamara sa national budget sa kabila ng pagbibitiw ni Budget Sec. Wendel Avisado. CONDE BATAC

Related posts:

(Sa pagbuo ng 2021 nat’l budget) KAMARA TUTULONG SA PALASYO (Isinusulong sa Kamara) 5-6% HIKE SA 2021 BUDGET (Isusulong sa Kamara) DAGDAG NA BUDGET SA AGRI PANUKALANG P5.024-T 2020 NAT’L BUDGET (Nasa Kamara na) 2022 BUDGET NG OP APRUB NA SA KAMARA (Tatalakayin na sa Kamara) EXTENSION NG VALIDITY NG 2021 BUDGET (Lusot na sa Kamara) EXTENSION NG BISA NG 2021 BUDGET P3.757-T BUDGET NAKABITIN PA