INCENTIVE SCHEME NG GRAB BANTAY-SARADO SA PCC

TODO bantay ang Philippine Competition Commission (PCC) sa incentive scheme ng ride hailing app na Grab sa kanilang mga driver-partner.

Ayon kay PCC Commissioner Johannes Bernabe, ito ay para masiguro na naibibigay ang tamang incentives ng mga driver.

“Babantayan din namin ang incentives nila kasi baka nadi-discourage ang ilang driver na magserbisyo sa ibang rider hailing app,” wika ni Bernabe sa isang panayam sa radyo.

Sa kabila ng presensiya ng iba pang app-based ride-hailing firms, nakokopo pa rin, aniya, ng Grab ang 99% ng mga pasahero.

“Ang atin pong binabantayan ngayon ay kung paano nila ine-exercise ang kanilang monopoly power. Walang mataas na kakumpitensya ang Grab sa ngayon,” dagdag pa niya.

Magugunitang inatasan ng PCC noong Nobyembre ang Grab na isauli ang P5 million sa mga pasahero nito dahil sa paglabag sa voluntary commitments nito sa anti-trust watchdog.

Inutusan din ng PCC ngayong buwan ang kompanya na ibalik ang P14.15 million dahil din sa kaparehong paglabag.

Sinabi ng Grab Philippines na sisimulan nila ang pagsasauli ng sobrang singil sa mga pasahero nito sa Disyembre 31.

Ayon sa Grab, ang refund sa mga pasahero ay ipagkakaloob sa pamamagitan ng GrabPay Wallet accounts sa susunod na Martes.

Isasauli ng Grab ang P1 para sa bawat P1,200 total fares na ibinayad ng isang pasahero mula Pebrero 10 hanggang Mayo 10 ngayong taon.

Ibabalik din ng kompanya ang P1 para sa bawat P450 total fares ng mga pasahero mula Mayo 11 hanggang Agosto 10, 2019.

“(T)hose select Grab riders who took a GrabCar ride in Metro Manila… may claim their disbursements through the GrabRewards Catalogue,” ayon sa statement ng Grab.

“Such passengers will have to fill in the information under the know-your-client (KYC) rules mandated by the Bangko Sentral ng Pilipinas (BSP).”

“Those who have completed the basic KYC process can directly redeem the amount which will be credited on their GrabPay Wallet accounts starting December 31, 2019,” sabi pa ng Grab.                 PILIPINO Mirror Reportorial Team